சுரேஷ் சத்ரியனின் கதை தான் “96” – பாரதிராஜா கடிதம்

கடந்த 2012 டிசம்பரில் எனது உதவி இயக்குநர் “சுரேஷ் சத்ரியன்” சென்னையில் உள்ள எனது அலுவலகத்தில் “92” என்ற தலைப்பில் கூறிய கதையைக் கேட்டு வியந்து, பாராட்டி உடனே அதை கொடைக்கானல் அடிவாரத்தில் உள்ள எனது தோட்டத்தில் ஒரு மாதத்திற்கும் மேலாக விவாதித்து “பால்பாண்டி என்கிற பாரதி” அல்லது “நீ, நான், மழை, இளையராஜா” என்கிற தலைப்புதகளில் அக்கதையை இயக்குவதாக முடிவு செய்திருந்தேன். ஆனால் தவிர்க்க முடியாத காரணங்களால் “ஒம்” படம் துவக்கப்பட, அதனுடைய வெளிநாட்டு படப்பிடிப்புகள் மற்றும் அதை சார்ந்த வேலைகளால் இந்த படத்தின் வேலைகள் சற்று தள்ளிப் போனது.

எனவே, அந்த காலகட்டத்திலேயே எனது ஆலோசனைப்படி மற்ற நடிகர், நடிகையர் மற்றும் தயாரிப்பாளர்களிடம் இக்கதை தொடர்பாக அணுகுமாறு கூறியிருந்தேன். அவரும் முயற்சி எடுத்தார்.

இது இவ்வாறு இருக்கையில் தற்போது வெளிவந்துள்ள “96” எனும் படம் MADRAS ENTERPRISES என்ற தயாரிப்பு நிறுவனத்தின் கீழ் “திரு.நந்தகோபால்” அவர்களால் தயாரிக்கப்பட்டு, திரு.சி.பிரேம்குமார் அவர்களால் இயக்கப்பட்டு, விஜய் சேதுபதி மற்றும் த்ரிஷா கிருஷ்ணன் நடிப்பில் வெளிவந்து ஓடிக் கொண்டிருக்கும் அப்படத்தை 11.10.2018 அன்று எனக்கு திரையிட்டுக் காட்டினார்கள்.

இத்திரைப்படம் தொடக்கம் முதலே எனது உதவியாளர் கூறிய கதையின் முழுப் பிரதியாக இருந்ததை கண்டு மிகவும் அதிர்ச்சியடைந்தேன்.

என் உதவி இயக்குநர் மனமுடைந்து மிகுந்த மன உளைச்சலுக்கு ஆளாகியுள்ளார்.

இது வேதனைக்கும், மனஉளைச்சலுக்குமானது மட்டுமல்ல, தடுத்து நிறுத்தப்பட வேண்டியது மற்றும் தீர்வு காணப்பட வேண்டியது என்பதை உணர்ந்து இப்படத்தின் தயாரிப்பாளர் திரு.நந்தகோபால் அவர்களை 12.10.2018 அன்று அழைத்து பேசினேன். எவ்வித முடிவும் எட்டப்படாததால், தற்போது தயாரிப்பாளர்கள் சங்கத்தை நாடியுள்ளேன்.

மேலும் “அசுரவதம்” படத்தின் இயக்குநர் திரு.மருது பாண்டியனை 2014 வருட இறுதியில் நண்பர் என்ற முறையில் அழைத்து தன்னுடைய கதையை சுரேஷ் விவாதித்துள்ளார். திரு.மருது பாண்டியன் “96” படத்தில் நடித்தது மட்டுமில்லாமல் அக்கதையின் கதை விவாதத்திலும் தொடக்கம் முதலே பங்கெடுத்துள்ளார். மருதுபாண்டியன் அவர்களை விசாரித்த பொழுது 2014ல் எனது உதவியாளர் கதை கூறியதை ஒப்புக் கொண்டார். இதன்மூலம் எனது உதவியாளரின் கதை எவ்வாறு “96” ஆனது என்பது வெளிப்படையாக தெரிய வந்துள்ளது.

தயாரிப்பாளர்கள் சங்கம் இதனை விசாரித்து தீர்வுகண்டு தகுந்த நடவடிக்கை எடுப்பதுடன், இவை இனிமேலும் நடைபெறாமலிருக்க அன்புடன் கேட்டுக் கொள்கிறேன்.

இவ்வாறு பாரதிராஜா தமிழ் திரைப்பட தயாரிப்பாளர்கள் சங்கம், தமிழ் திரைப்பட இயக்குனர் சங்கம், தமிழ் திரைப்பட ஒளிப்பதிவாளர் சங்கம் மற்றும் தமிழ் திரைப்பட தொழிலாளர் சங்கம் ஆகிய சங்கங்களுக்கு கடிதம் அனுப்பியுள்ளார்.\

 

 

Leave a Reply

Your email address will not be published.

19 + nine =